Määdd kaaupšumuš
Lappi ELY-kõõskõs vuäitt kaaupšed nuõrttsääʹmmvuuʹdest jeälsteeja nuõrttsäʹmmla määdd vuõss-sââʹjest põõrt raajjâm diõtt jeänmõssân vitt hehtaar. Nuõrttsäʹmmla ouddlest vuäʹmstem päikka vueiʹtte kaaupšed lââʹssmäädd. Uʹccpõõrǥâståimmʼmam väʹrdd še vueiʹtte kaaupšed määdd. Keväjääuʹrest liâ veâl kaaupšemnalla sääʹmlääʹjj meâldlaž âânnmõʹšše õõlǥtum põrttsââʹjj, koin lij kååddlažtekniikk valmmša. Vaaldšemserddmõš Mieʹcchalltõõzzâst lij õõudâs vueiʹtlvaž.
• Nuõrttsääʹmmvuuʹd mäddkartt
Ǥu ääiǥak haʹŋǩǩeed määdd, vääʹld õhttvuõđ Lappi ELY-kõõskõʹsse leʹbe Aanar kååʹdd mäddvuʹvddjieʹllemvueʹǩǩveʹrǧǧnekka. Seeʹst lij ääiʹjtääʹsslaž teâtt Keväjääuʹrest kaaupšemnalla åårrai põrttsõõʹjin. Jõs tuäivvan lij põrttsââʹjj jeeʹres åʹrnn nuõrttsääʹmmvuuʹdest ǥu Keväjääuʹrest, vääʹld õhttvuõđ Lappi ELY-kõõskõʹsse. Lappi ELY-kõõskõs seʹlvvat õõutsââʹjest Mieʹcchalltõõzzin, leʹčče-a tuu eʹtǩǩeem vuʹvdd vueiʹtlvaž seʹrdded nuõrttsääʹmmlääʹjj meâldlõʹžže âânnmõʹšše.
Siâzztõõllâp leeʹd õhttvuõđâst Lappi ELY-kõõskõʹsse pâi ouddâl ooccmõõžžad kuâđđmõõžž jeärbõʹžžen, ǥu tuäivvan lij vuäǯǯad määdd jeeʹres åʹrnn ǥu Keväjääuʹr vaalmâš põrttsõõʹjin.
Määdd oocci kuõskki määin
- Leäk nuõrttsäʹmmlaž
- Jeälstak totšnõʹžžen nuõrttsääʹmmvuuʹdest
- Leäk 18–49-ekksaž mäddvuäǯǯamooccmõõžž tuejjeem šiâtt. Jeäʹrmõõzzâst veäʹrest ââʹǩǩraaʹjest vueiʹtte rättjed, tâʹl oocci vuäitt leeʹd jeänmõssân 55-ekksaž.
- Leäk tällsaallaž sââʹjest, jäällmõšstad da personpuõttlaž ooddinad nåkam, što staanmõõžž vueiʹtte ââʹnned õõlǥtem-meâldlõʹžžen. Ooʒʒi da pieʹllkueiʹmm puåđ, väärrvuõđ da jeeʹres jäällmõõžž väʹldde lokku.
- Eeʹǩǩpuåđ liâ jeänmõssân 42 600 € (õhttujeälsteei) leʹbe 55 900 € (pieʹllkueiʹmin õhttsõʹžže). Päärnažpââjõs 2100 €/vuâlla 18-ekksaž porrmõškådda kuulli päärnaž.
- Nuõrttsääʹmmlääʹǩǩ / Kolttalaki 253/1995 (finlex.fi, ääiʹjpoddsaž lääʹjjšiõttummuš lääddas)
- Nuõrttsääʹmmšiõttõs / Koltta-asetus 133/1997 (finlex.fi, ääiʹjpoddsaž lääʹjjšiõttummuš lääddas)
- Sääʹmǩiõllsa šiõttõõzz (finlex.fi)
- Mädd- da meäʹcctäällministeria tuʹmmstõk nuõrttsääʹmmlääʹjj meâldlain jäänmõspuåđraajin (43/2012)
Mäddooccâmproseʹss
Vuäitak altteed mäddvuäǯǯamooccmõõžž teâuddmõõžž, ǥu suåvlaž mäddvuʹvdd lij käunnʼjam. Mooštak-ala lookkâd ooccmõõžž vuäʹpstõõzzineez da teâudded ooccmõõžž tääʹrǩeld. Tääʹrǩest ouddâl ooccmõõžž kuâđđmõõžž, što tiiudak nuõrttsääʹmmlääʹjj meâldlaid määdd vuäǯǯai kuõskki määinaid. Kueʹđ mäddvuäǯǯamooccmõõžž meâlddõõzzineez Aanar kååʹdd mäddvuʹvddjieʹllemvueʹǩǩveʹrǧǧnekka. Mäddvuʹvddjieʹllemvueʹǩǩveʹrǧǧneǩ oudd ooccmõõžžâst ceälkkmõõžž da tååimad ooccmõõžž õõutsââʹjest ceälkkmõõžžin Lappi ELY-kõõskõʹsse. Ooccmõš puätt tuʹmmjem vuâlla, ǥu tõt lij kuõđđum Lappi ELY-kõõskõʹsse.
Proseeʹss ouddnummuš, ǥu ooʒʒak määdd Lappi ELY-kõõskõõzz vaaldšem määddain (Keväjääuʹr põrttsââʹjj)
Lappi ELY-kõõskõs väʹldd ooccmõõžž ǩiõttʼtõõllmõʹšše. Ooccmõõžžâst vueiʹtte raukkâd ceälkkmõõžž še Nuõrttsääʹmmsuåvtõõzzâst. Lappi ELY-kõõskõs tuʹtǩǩad, teâudd-a ooʒʒi da ooccmõš mädd miõttâm määinaid da tuejjad tuʹmmstõõǥǥ ääʹššest.
Proseeʹss ouddnummuš, ǥu ooʒʒak määdd Mieʹcchalltõõzz vaaldšem määddain
Lappi ELY-kõõskõs väʹldd ooccmõõžž ǩiõttʼtõõllmõʹšše. Ooccmõõžžâst vueiʹtte raukkâd ceälkkmõõžž še Nuõrttsääʹmmsuåvtõõzzâst. Jõs mädd ooʒʒi kuõskki da jeeʹres lääʹjj meâldlaž määin (jm. vuʹvddšorradvuõtt da ââʹnnemõõlǥtõs) teâuddje, Lappi ELY-kõõskõs alttad saǥstõõllmõõžž vaaldšemserddmõõžžâst Mieʹcchalltõõzzin. Jõs cõgldõõzz vaaldšemserddmõʹšše jeäʹla, ELY-kõõskõs rääjj mieʹrrvuuʹdest vaaldšemseʹrddemeʹtǩǩõõzz Mieʹcchalltõʹsse. Mieʹcchalltõs oudd ceälkkmõõžž eʹtǩǩõõzzâst da seʹrdd vaaldšemseʹrddemeʹtǩǩõõzz ceälkkmõõžžineez mädd- da meäʹcctäällministeria ǩiõttʼtõõllmõʹšše. Mädd- da meäʹcctäällministeria oudd tuʹmmstõõǥǥ ääʹššest. Tän mâŋŋa Lappi ELY-kõõskõs tuejjad mäddkaaupšemtuʹmmstõõǥǥ.
Vaʹrrjõõđ kuuʹǩǩab ǩiõttʼtõõllâmäigga Mieʹcchalltõõzzâst ELY-kõõskõʹsse vaaldâšmseʹrddem oudldem vueʹjjest.
Kauppraajjmõš
Vuäitak ooccâd põrttraajjâmlååʹv juʹn mäddkaaupšemtuʹmmstõõǥǥ vuâđast. Lappi ELY-kõõskõs šiõttâd mäddkaaupšemtuʹmmstõʹǩǩe põrttraajjâm-määin, koon mieʹldd mäddkaaup âʹlǧǧe tuejjeed da põrttraajjmõš âlgg altteed mââimõssân koolm eeʹjj ǩeeʹjjest mäddkaaupšemtuʹmmstõõǥǥâst. Kauppǩeeʹrjid vuäitt vuâllaǩeeʹrjted emansa mäddkaaupšemtuʹmmstõõǥǥ läiʹttemääiʹj mâŋŋa. Kauppǩeeʹrjid räʹjje tõn määʹttest, ǥu Lappi ELY-kõõskõs lij ainsmõõvvâm, što põrttraajjmõš puätt teâuddjed. Jõs ooʒʒak põrttraajjmõʹšše valdialääin, vuâllaǩeeʹrjte mäddkauppǩeeʹrj da põrttraajjmõʹšše kuulli valdialääin seämmaääiʹj.
Ooccâmlomaakk (572) käunnʼje Porrmõšveʹrǧǧkoontâr neʹttseeidain.
Lââ´ssteâđaid:
- pâʹjjtaʹrǩǩeei Inka Ahonen, Lappi JJP-kõõskõs, teʹl. 0295 037 096, neʹttpååʹšt: risttnõmm.sokknõmm@jtp-kõõskõs.fi ([email protected])
- mäddtäällpiisar Minna Pulju (Aanar kå´dd, jânnamvu´vddtuåimm) te´l. 040 357 6077 ne´ttpåå´št: etunimi@[email protected]
ely-updated 06.04.2023